Impressie van de Groninger Dienst 2014

Meer den n kerkdainst

Ainmaol in t jaor wordt der in Amsterdam een Grunneger kerkdainst hollen. Dit keer al veur de achtste maol. Doar komt hail wat volk op aof. De kerke beneden zat vol. Ankom jaor wol Hanne Wilzing, ain van de organisatoren, de gallerijen ook wol vol hebben. Dit keer wadden der wol 350 man. Verschaaiden mensen wadden der veur de eerste keer.

Doomdie Harry Donga luit lezen over Jona en preekte over de farizeeërs dai n taiken van Jezus zain wollen. De titel van de preek was " 't Kin ook aans".  Gong t anner jaoren in preek nog wol ais over de veronderstellen dat de Grunnegers in t westen einigzins ontheemd binnen. Dit keer gong t over Jona (zien naom betaikent doeve) dai  deur de aandere opvaorenden in zee jonast wur. Doomdie huil ons veur dat wie in actie kommen mossen en nich as Jona der vandeur goan zollen. Tiedens de preek wuien der beelden vertoond van unner aannern de doeve in de grode vis.

Foto: Tess Jungblut.

Drai maol wur der zongen deur Marlene Bakker, oafkomstig oet Smilke*. Zai wur op de toetsen begelaaid deur Gerhardt Heusinkveld en Charles Belfor. t Örgel wur bespeuld deur Christiaan de Vries.
De Grunneger dainst is meer den n kerkdainst. Net as in veul kerken wordt er nao de dainst kovvie dronken mit wat der bie, hier natuurlijk mit Grunneger kouke en dit keer sponsort deur Knol oet Stad. Mit de kovvie en kouke in d haand zain hail veul olle bekennen nander weer en koom ie aan de proot mit onbekennen, dai ooit in Grunnen woond hebben of der geboren binnen. Nao de dainst wui der ook nog n rondlaaiden geven deur dai olle kerke. Vanoet de kerke nich te zain is der n glas-in-lood raom mit Luther en de zwaone.

Verder wur de reclame maokt veur t Wereldhuis (www.wereldhuis.org) veur hulp aan under aannern boetenlanders, dai hier binnen zunder papieren.

Foto: Tess Jungblut.

Biezonder wadden ook de foto's van fotograof Martin Wiegand over t Grunneger landschop.

Ankom jaor wordt de Grunneger dainst hollen op 25 oktober. Weer in Olle Lutherse Kerk in Amsterdam.

Geert Luth, Heiloo.

*Het buurtschap ‘Smilke’ (Smeerling) ligt tussen Onstwedde en Vlagtwedde